Río Pulgán

O Rego de Pulgán ou Río Pulgán nace nas alturas da Mámoa de Segade, do Marco de Pulgán e do Monte de Rego de Frade, a case que 800 metros de altitude, elevacións da Dorsal Central Galega que separan as provincias de Pontevedra e Ourense no límite entre os concellos de Dozón e O Irixo. Como é habitual en Galicia, esta corrente de auga irá cambiando o seu nome cada pouco, sendo Río de Seixas unha vez pasada a praia fluvial de Sanguiñedo e Rego Valiño antes de unirse ó río Asneiro, xa no concello de Lalín. O tramo entre as fontes e a praia fluvial ten derredor de 4,5 quilómetros de longo. Ecoloxicamente é un espazo de río de media montaña que, polo seu encaixamento, presenta un denso e ben conservado bosque de ribeira no que os bidueiros son o máis claro sinal vexetal da simbiose entre a notable altitude e o ámbito fluvial. As elevadas precipitacións serráns, que poden superar os 1.800 milímetros anuais, posibilitan un caudal permanente e abondoso que explica a grande cantidade de muíños que hai para un tramo tan curto de río. Estes, en número de seis, poñen a nota de aproveitamento humano nun paseo por un espazo cunha biodiversidade vexetal e animal privilexiadas.