Cruceiro de Sanguiñedo I
O cruceiro atópase vencellado á igrexa de Santa María de Sanguiñedo e, por dito emprazamento e estar dotado dun pequeno altar a modo de mesa de ofrendas, podemos dicir que se asocia cunha función de parada de procesións e enterros. Comezando pola súa parte inferior, non presenta plataforma e parte directamente dun pedestal cúbico e biselado de aproximadamente un palmo de alto. O varal inicia e remata cúbico, mais a sección principal é octogonal, realizándose a transición en punta de frecha cóncava en caras alternas e contendo esta curvatura unha decoración xeométrica a modo de bolas. O capitel, perfectamente embutido na columna, destaca pola súa notable sección. Presenta unha parte inferior en forma tronco-prismática invertida con caveto na moldura principal, escondendo na parte intermedia un prisma rectangular rebaixado e, por fin, amosando unha moldura superior cuadrangular composta por dous filetes en banzo invertido. A cruz é lisa, sen inscricións nin figuras, de forma octogonal e de remates florenzados en pau e travesas. O xa comentado pousadoiro de ofrendas, de pedra coma o resto, consta de tres pezas: a táboa superior, elevada a uns 70 centímetros, está soportada por dous pés moi distintos, sendo o máis próximo á columna simple, pero o exterior consta dunha peza cadrada cun furado central.