Cruceiro de Dozón I

É un cruceiro de gran calidade artística situado nas inmediacións da igrexa de Santa María de
Dozón. Nun lado da cruz latina vemos a Cristo e noutro á Virxe coroada por dous ánxeles. É unha
iconografía de orixe medieval que xorde da devoción de María como Nai. A súa representación é
pouco habitual en cruceiros así como a súa imaxe, habitualmente en actitude piadosa, mirando ao
chan coas mans en oración. Neste cruceiro a Virxe mira cara arriba e apoia a súa man esquerda
no seu ventre, lembrando ás Virxes góticas que representan a Anunciación.
As figuras están apoiadas sobre un capitel de inspiración xónica e fuste estriado de dúas formas
diferentes, na parte superior as estrías son máis finas que na inferior. Remátase con moldura
sinxela e apoiase sobre a base cúbica que descansa nunha plataforma feita con tres pedras
circulares a modo de grada.