Camiñando: praia fluvial de Sanguiñedo - Seixas

Partimos da praia fluvial de Sanguiñedo seguindo a estrada local cara ó oeste para, en 300 metros, desviarnos por unha pista asfaltada que cruza, entre árbores de ribeira, o río Seixas. Pouco tempo despois veremos unha pista á dereita que leva a Seixas, pero nos interesa continuar polo frondoso bosque de carballos para acadar o máxico lugar do igrexario de Sanguiñedo, tranquila e solitaria paraxe exemplo dos templos apartados dos núcleos de poboación. Ó conxunto de igrexa, cemiterio e cruceiro hai que engadir un impresionante carballo, de dimensións monumentais.

Volvendo, tomaremos a pista de Seixas, entre bosques de ribeira e carballeiras á esquerda e, á outra beira, unha extensa repoboación forestal a base de piñeiros de Monterrei e algúns marítimos. Baixo os piñeirais, segundo a época, descubrirase unha rechamante florida matogueira de queiroas, carqueixas, breixos e toxos. Acádase de novo o río en Ponte das Lamas (km 2), lembrando antigas medras que deixaban prados e bosques asolagados e “levaban” por diante as pontes. Esta, que hoxe é unha pasarela de madeira, tivo anteriormente un armazón de vigas sobre o que se dispoñían grandes lousas, soportado todo polos dous piares de pedra.

Seguidamente comeza un treito que discorre polo bosque do río, coa corrente pegada á nosa dereita, formando un verdadeiro oasis de biodiversidade. Pasado un saínte rochoso crúzase un afluente que baixa dende a aldea de Vilar de Montes, podendo observar aquí algún dos grandes sanguiños que dan nome á parroquia.

Pouco a pouco ascéndese e se outea o val, as súas escarpadas ladeiras, un tramo encaixado cos Prados do Río no seu fondo. Neles houbo un muíño que hai anos foi arrasado por unha enchente. A cañada fluvial ofrécenos unha ampla e formidable panorámica cara ó sueste do concello. O camiño empínase pola Costa da Silva, pero por pouco tempo, pois unhas curvas nos deixan en Cabo do Agro, extremo dos terreos agrarios de Seixas. A nosa ruta dá volta tras ver a aldea, un lugar aireado, elevado, con fonte e con árbores froiteiras así como exemplos de arquitectura tradicional. Retornaremos repetindo a experiencia.