Cruceiro do Castro III

Situado na aldea de Cadaval, á beira dun camiño, posiblemente constitúe o cruceiro máis orixinal do concello a nivel histórico. Diante del aparece unha lápida vertical con inscrición que lembra a morte de 24 soldados do exército liberal fusilados a mans dunha columna carlista o 16 de xuño de 1839 durante a Primeira Guerra Carlista. O texto di “HÍZOSE / A LA MEMORIA DE LOS SOLD / ADOS QUE HAN MUERTO EN / ESTE CAMPO FRENTE A LA / CALABERA EL DÍA 16 DE JUNIO /  DE 1839. UN PADRENUESTRO”. No referente ás súas características artísticas presenta tamén algunhas singularidades. Ten un pedestal cilíndrico, alto e pouco traballado. Sobre o mesmo elévase o varal, bastamente asentado, columna que comeza cuadrangular e segue octogonal rebaixada sensiblemente en oitavado, con transicións en punta de frecha. Na parte alta deste fuste aparece un frade franciscano cun libro no brazo dereito, hábito saial con pregues, coa cruz na man esquerda e o habitual cordón da congregación. Como transición cara ó capitel vese un colar octogonal fino, que se abre dende un rebaixe en concavidade irregular para dar acollida enriba a volutas espirais en forma de caracol que lembran o estilo xónico. Pola súa parte, o crucifixo é extremadamente simple, de sección cilíndrica, liso, sen inscricións nin figuras.